本帖最後由 檸.樂 於 23-4-2010 06:17 編輯
其實正確唱歌用既係頭音, 唔係假音。
英文叫 head voice,通常D 專業歌手講都會講 head voice,亦即係頭音,有時超級巨聲D 評判都會講 head voice。不過大部分人都以爲頭音同假音係同一樣野,因爲音質似。
假音最大特點係主要用喉嚨,但對聲帶真正既運用得好少。聲帶基本上有兩條,平時唔出聲會痴埋一齊,好似 ---->( ll )。如果出聲,聲帶會由下開始分開,越低音分開得越少,越高音分開得越多;而聲帶振動既地方係痴埋既部分。
低音/真音/胸音------> (八)。 [胸音基本可以話係大部分人所講既真音]
高音/假音------> (/\)。
好似上圖既高音,假音用既地方只係聲帶痴埋個一點,換句説話黎講,假音對於聲帶既運用比真音少,所以控制會難好多,聲量亦同真音相差好遠。同真音唔同,無論唱得高音既假音同唱得低音既假音都只係用兩條聲帶最邊緣個位黎發聲。
至於頭音,同假音唔同既地方,就係頭音好似真音咁,聲帶由下至上分開,越高音分開得越多。頭音如果唱得低音,聲帶用既地方會比假音多,聼落亦會比較舒服同容易控制,而且音色會較似胸音。頭音唱得越高音,聲帶會分開越多,用既地方會越黎越少,所以頭音唱得越高,聼落同假音越似。
如果要練,唔好練假音,練頭音,因爲無論音質定控制都係頭音優勝。而且頭音可以做到假音既效果,但假音做唔到頭音既效果。加上,假音對聲帶唔好。由於假音一只係用聲帶最邊個位發音,亦即係條聲帶要分開到盡先發到音,所以要唱歌時要轉音去假音好多時都要去到好高音先轉到,而轉音前一直都係真音,即係話要用用真音嗌到盡先轉到。(或者就係樓主所講既尖叫聲,不過有D 人可能可以容易D 轉假音,所以未必要嗌盡先轉到,但都要嗌到9成。而D 人難D,如樓主....可能要去到10成先轉到假音。)
而如果用頭音,轉音可以好舒服,好多時好低音已經可以轉到音,可能胸音只係上到7成就已經轉左音。但即使轉左音,音色亦會同胸音差唔多,所以可以做到 “聼唔出轉左音” 既效果,聼落會好流暢。而且頭音可以越練越高。如果未練過聲,認真練,一年最少可以練高 8 個 key。
如果要練頭音,首先要識用丹田呼吸,跟住再學用共鳴位。基本上唱歌用既共鳴位主要有兩個,胸,同頭;所以會叫胸音同頭音。
樂古應該有 post 教丹田呼吸同胸部運用,至於頭部運用(頭音),你只要去 youtube search: head voice 就有一大堆片教你,畢竟有示範好過我靠文字黎教你。 |